Whakarewa ingoa
Ngā Puka Whakarewa Ingoa
Mehemea kei te rārangi pōti koe mō tētahi pōtitanga poari e haere ana i tēnei wā i tō kura, te tikanga kua whiwhi kē koe i tētahi pōti whakarewa ingoa mā te mēra, mā te īmēra rānei.
Mehemea kāore anō koe kia whiwhi puka, whakapā tika atu ki a rātou.
Me pēhea te whakarewa ingoa?
Ka taea e tētahi tangata ahakoa ko wai, kei te rārangi pōti o ngā mātua, o ngā kaimahi, o ngā ākonga rānei te whakarewa i tōna ake ingoa – ehara i te mea me tatari koe kia mahia e tētahi tangata kē.
Ka āhei hoki koe te whakarewa i te ingoa o tētahi tangata kē, ki te whakaae ia ki te tū. Ka taea hoki e koe te whakarewa i ētahi tāngata maha atu i te kotahi.
Mehemea ehara koe i te matua i te kura, ka taea tō ingoa te whakarewa e tētahi tangata kei te rārangi mātua o te kura.
He aha tēnei mea te tauākī kaitono?
Mehemea ko koe te kaitono, ka āhei koe ki te tuhi kōrero i āta tuhia (tae atu ki te 400 kupu) hei whakamōhio i ngā kaipōti ki a koe.
He whāinga wāhi tēnei kia whakahuatia tō momo hapori, ō ngākau-nui, tō ngākau-ū, me ngā āhuatanga ka mauria atu e koe ki tētahi poari kura.
Anei ētahi āhuatanga ka hiahia pea koe ki te whakaahua i roto i tō tauākī – tō tautōhito, ō tohu mātauranga, mahi rānei, ō pūkenga, ō mahi kaingākau, me te take e hiahia ana koe ki te tū.
Ka āhei hoki koe te whakauru i tētahi whakaahua ōrite ki te whakaahua uruuruwhenua.
Me whiwhi te āpiha pōti i tō tauākī kaitono i āta waitohungia e koe, i mua i te wā kati e whakakitea ana i tō puka.
He aha ngā āhuatanga ka pā i muri i te katinga o te whakarewanga ingoa?
E rua ngā putanga tērā pea ka pā i muri i te katinga o te whakarewanga ingoa:
-
He pōtitanga pōti kore: Mehemea he iti iho, he taurite rānei te maha o ngā whakarewanga ingoa i tae mai ki te maha o ngā tūranga wātea, kua pōtitia katoatia ngā kaitono ki te poari.
-
He pōtitanga pōti: Mehemea neke atu te maha o ngā whakarewanga ingoa i tae mai i te maha o ngā tūranga wātea, ka tū he pōtitanga.